من أهم قطع الموبيليا في البيت؛ لأننا بنستخدمها كتير، ومتهيأ لي مفيش بيت ممكن يستغنى عن الترابيزات. ترابيزة السفرة وهي تعتبر أكبر ترابيزة في البيت وليها أشكال عديدة ففيه المربعة وفيه المستطيلة وفيه منها المدورة وفيه البيضاوية، وأكتر الأشكال الموجودة عندنا في البيوت في مصر هي الترابيزة المدورة والمستطيلة.. وبالنسبة للمدورة فهي بتكون مناسبة للبيوت الصغيرة، وممكن تكون عبارة عن عمود خشب أو جبس أو رخام وعليه قرصة زجاج، وممكن تبقى خشب مدورة بتتفتح تبقى بيضاوية. أما بالنسبة للترابيزة المستطيلة فممكن تكون عبارة عن عمودين خشب إستر "بني" أو عمودين جبس واخدين شكل الرخامة أو الحجر وعليهم قرصة زجاج، والشكل ده من الترابيزات غير عملي لأن صعب تحركها جدًّا، وعلشان نحركها لازم نشيل الزجاج وبعدين نشيل كل عمود لوحده، والعمود بيكون تقيل جدّاً ولو تحتها سجادة ممكن إنه يبوظ السجادة.. أما الشكل المربع فبيكون أكتر في الترابيزات الإنجليزي والمودرن، وميزة الترابيزة دي إنها بتاخد 8 أشخاص كل اتنين جنب بعض. طبعا لو كان الفرش كلاسيك فيفضل إن ترابيزة السفرة تكون خشب مطعم بالنحاس، ولكن مع المودرن ممكن تكون الترابيزة العمود اللي عليها قرصة زجاج أو الترابيزة المربعة ونغطيها بالجلد. كافي تابول أو ترابيزة الوسط
تاني أهم ترابيزة عندنا في البيت هي دايما الترابيزة اللي بتوضع في وسط الصالون أو وسط الأنتريه أو الليفنج روم، والترابيزة دي بتكون واطية لا يزيد ارتفاعها عن ارتفاع قاعدة الكنبة من 40 إلى 50 سم، وبتكون مربعة أو مستطيلة. لو العفش كلاسيك بتكون الترابيزة مصنوعة من الخشب المطعم بالنحاس أو الخشب "الماركتريه" بمعنى تداخل كذا نوع من الخشب مع بعض، وممكن تكون القرصة بتاعتها رخام.
بالنسبة للأثاث المودرن فممكن تكون الترابيزة مصنوعة من الخشب أو الفيرفورجيه لو إحنا حاطين كنبتين متنجدين كل كنبة 3 مقاعد لازم الترابيزة تكون مربعة مش مستطيلة، ومن الأفضل يكون مقاسها 90 في 90 أو متر × متر. لو كنبة 3 مقاعد وكنبة أخرى مقعدين يبقى الترابيزة تكون متر × 60 يعني مستطيلة.
لو الكنبتين في وش بعض كبار ممكن نحط ترابيزتين إخوات تونيز، وعليهم قرصة زجاج واحدة، ونسيب فرق بين الترابيزتين عشرة سم. فيه أشكال كتيرة لترابيزة الوسط بتمشي مع كل أنواع الأثاث سواء الكلاسيك أو المودرن.. فعلي سبيل المثال نجيب قطعة خشب قديمة أو باب هندي قديم، ونعمل له رجلين، ونحط عليه زجاج يبقى ترابيزة. السايد تابول "ترابيزة الجنب" ودي بتكون جنب الكنبة أو بين كرسيين كان زمان شرط إن الكافي تابول والسايد تابول يكونوا زي بعض نفس الشكل والخامة، لكن دلوقتي مع طرق الفرش الحديثة مش شرط إنهم يكونوا زي بعض خالص. فيه أشكال كتير للسايد تابول منها المدور والمربع والمستطيل. بالنسبة للمربع والمدور ممكن يتحطوا في الصالون يمين وشمال الكنبة، أما المستطيلة فتوضع بين كرسيين. ممكن كمان بالنسبة للصالون إننا جنب الكنبة نحط ترابيزة مدورة عليها مفرش قطيفة مغطيها لغاية الارض يعني الترابيزة مش باينة نهائي، وبكده ممكن إننا نشتري ترابيزة مصنوعة من الخشب الرخيص؛ لأنها بتكون مش باينة نهائي، ويكون عليها من فوق مجموعة من البراويز عليها صور العيلة مع أباجورة. الصوفا تابول هي ترابيزة مستطيلة ارتفاعها قد ارتفاع ترابيزة السفرة، ممكن تكون مكملة لترابيزة السفرة، وممكن توضع في مدخل بيت كاكونسول. ترابيزة غرفة المعيشة
وهي من أهم التربيزات التي تستخدم في البيت، وبما أننا بنستخدمها كتير فلازم تكون عملية ومصنوعة من خشب جيد، وأنا شخصيا بأفضّل إننا نجيب ترابيزة فيها أدراج ولونها يكون غامق، ويكون عليه زجاج من فوق ومساحتها تكون كبيرة. ودي تشكيلة من الترابيزات
الأحد مايو 25, 2008 12:26 pm
